Ini kisah ulahan ulun surang, di ambil dari tugas Mata Kuliah Bahasa Banjar.. Mudahan bamanfaat :) Silahkan dibaca!
Awak kuning langsat, tinggi samampai, baisian sojen subalah kiwa, rambut panjang taurai, kada lain ciri
pa-awakannya si Khadijah anaknya tukang sate. Khadijah
ngini idula dikampung. Mun
inya liwat mata bubuhan lalakian kada sing kijipan.
Bulan baganti bulan si Khadijah maurak bulu. Sakitar umur 17 Khadijah
ditinggalakan kuitan lakinya. Abahnya maninggal lalu umanya balaki pulang lawan buruh nang rancak manggini-i umanya kapasar bajualan wadai. Dari parkawinan
umanya nih Khadijah sabujurnya kada satuju lalu baisi abah tiri. Soalnya masih kaingatan kuitan laki ujud. Tapi
nang ngarannya cinta kada kawa ai, nang uma handak balaki lagi.
Pas rahatan mandi Khadijah takajut banar, inya malihat abah tirinya timbul ada
dibalakangnya ja.
“Abah, mapa Pian disini
?” ujar Khadijah sambil
manutup awaknya lawan tapih.
“Anu... Abah handak maambil sabun banar, ai,” ujar sidin manyahut.
Kada tapi banyak
pander, Khadijah langsung masuk kamar mamuruk baju sakulahnya. Imbah itu
langsung ai Khadijah mandatangi umanya handak basaliman.
“Ma, ulun tulak sakulah dulu, lah. Assalamualaikum...” (Sambil mancium tangan umanya Khadijah
tulak kasakulah).
***
Imbah sampai di
sakulahan.
“Kanapa muha ikam pina pucat kaitu, Jah?” takun Siti kawan akrabnya Khadijah.
“Kada papa,” sahut
Khadijah langsung masuk kelas.
Siti bingung malihati
kawannya yang saikung nih, pina kada biasanya.
Teng... Teng...
Teng....
Kada tarasa
lonceng tanda bulikan sakulah
sudah habis. Siti pun mandatangi Khadijah nang dilihatnya dari tapi pina hinip
kada sing bunyian. Nang biasanya istirahat mambawai makan kakantin, timbul
badiam haja dikalas. Malihat kalakuan kawannya nang pina hinip, Siti pun managur.
“Kanapa garang ikam ni, Jah... Kada kaya biasanya pina simpun lalu duduk
dikalas kada sing buriniknya. Garing kah ikam?”.
Khadijah manjawab
lawan gelengan kupalanya ja. Malihat kalakuan kawannya. Siti baisi akal. Siti lalu mangibit
tangan Khadijah. Marasa kasakitan Khadijah bakuciak.
“Aduuuhh !!! Kanapa ikam mangibit tanganku ! sakit tahu kada !” Khadijah bamamai
lawan si Siti sambil mamusut-musut tangannya.
Mandangar Khadijah
basuara. Siti tatawa dikulum sambil manutup muntungnya.
“Ikam jua mulai tadi kutawaki kartas sampai kutawaki pulpen kada tahu-tahu muha lawan aku, sampai bulikan pina
kada tahu-tahu dimuha jua.
Kanapa garang ikam nih?” si Siti batakun pulang.
“Kada papa... Jarku !” disahuti Khadijah.
“Kita ni Dijah, ai bakawan tu kada satahun dua tahun pang, jadi kada kawa
pang ikam mangaramputi aku,” jalas Siti sambil manarik bangku
duduk baparak Khadijah.
“Kaina dulu. Jam barapa dah, nih ?”
Khadijah batakun.
“Jam 1”.
“Astagfirullahaladzim... aku ada janji lawan umaku habis bulik sakulah langsung mandatangi sidin
ka pasar,” ujar Khadijah langsung maambil tas handak kaluar.
“Dijaaaaaaahhhh... hadangi aku !!!” Kuciak Siti kada hakun katinggalan.
***
Imbah sampai di
pasar Khadijah langsung mandatangi Umanya.
“Ma’af Ma, ai ulun talambat. Siti ni pang mambawai bapanderan imbah bulik sakulah
tadi. Tu jadi ulun talambat,” jalas Khadijah tapagat-pagat.
Mandangar nang
kaya itu Siti pun kurihing-kurihing lawan umanya Khadijah.
“Lajui ja antar wadai kawadah acil Inur, sidin mahadangi dari tadi sing lawasan,” ujar uma Khadijah .
Langsung ai
Khadijah nang dikawali Siti manjumput wadai pasanan nang dimaksud. Imbah
manjulung wadai ka wadah acil Inur bulik ai lagi buhannya ka rumah
masing-masing.
***
Imbah di rumah, Khadijah
kaluar kamar mandatangi abah tirinya nang lagi duduk di ruang tamu.
“Mama balum bulik ja kah lagi, Bah ?”Khadijah batakun.
“Sudah tadi. Tapi ka wadah mama Amat pulang maantar wadai ”, Ujar abahnya.
Mandangar
panjalasan abah tirinya sangkal banar hati Khadijah. Kayapa kada sangkal dari
sungsung sampai bulik sakulah dirumah haja gawian abah tirinya nih. Mancari
gawian maka kada, salawas di pecat dari buruh bangunan. Masuk Khadijah ka
kamarnya maambil baju handak mandi. Malihat Khadijah handak mandi tunggal
gimitan Abah tirinya nih manutup lawang muka, jendela higa mahiga. Imbah
tuntung mandi Khadijah masuk kamar handak babaju. Malihat Khadijah imbah mandi,
baparak langsung abah tirinya ka kamar Khadijah. Malihat abah tirinya pina
mancangangi mulai bawah sampai atas Khadijah balangsungai sidin manarik anduk Khadijah.
Untungnya, Khadijah sawat dah babaju. Khadijah takajut.
“Astagfirullahaladzim...Apa nang handak pian anu ka ulun?” Gitir-gitir
Khadijah bakabuncu.
Kada banyak pander
abah Khadijah langsung manarik tangan Khadijah, Sawat tarabah abah Tirinya tadi
langsung mangacak pagalangan Khadijah. Marasa sudah kada nyaman Khadijah
maiguti pagalangan abah tirinya tadi. Marasa kasakitan tangan Khadijah di lapas
akan. Khadijah balangsungai bakuciak minta tolong.
“Tooolooong.... Toloooonggg..... !!!!!”. Sambil manggedor-gedor lawang
Khadijah bakuciak. Marasa lawang sudah dikunci, lawan kuncinya sudah di simpan.
Tatangis katakutan Khadijah malihati abah tirinya tadi mulai baparak pulang.
“Kada kawa kaluar pang ikam, kuncinya aja ada lawan aku....”, Ujar abah
tirinya sambil tatawa pina kaya kahantuan.
Khadijah
katakutanan banar, pas abah tirinya tadi mulai baparak pulang. Di tinjak oleh
Khadijah parut abahnya, balangsung, ai Khadijah bukah ka dapur. Untungnya lagi
lawang dapur kada ba kunci. Langsung bukah-bukah ai Khadijah kada sawat
basandalan.
“Uuuu.... Khadijah.... Handak kamana ?” Kuciak urang di sabarang rumah,
kada tahu sapa ngarannya. Kada tatahu lagi, Khadijah bukah-bukah katakutanan.
Tiiiiiiiitttttttttttttt.....
Bunyi rem sapida
motor bakajutan. Marasa sudah lamah banar. Khadijah gugur pingsan.
***
Beberapa manit
kemudian.
“Khadijah ? Sadar kah sudah ?” Takun bibinian saparu baya.
“Si... Si... ti ? Aku dimana nih?”, Takun Khadijah bingung sambil babangun.
“Di rumahku. Ikam tadi pingsan ditangah jalan. Sadikit lagi handak ditabrak
urang tadi ikam. Untung aku lawan amangku malihat, balangsung, ai kami mambawa ikam
ka rumah. Kanapa garang ikam nih, Dijah, muha pina pucat pasi, nang kaya itu?”,
Siti batakun pina maras lawan Khadijah.
Sambil manangis
Khadijah mangisah akan nang di alaminya tadi. Sarik banar Siti mandangarnya.
“Mun kaitu, sini aku datangi langsung ka rumah balangsung kah mambawa katua
RT !!”Ujar Siti pina pamustinya.
“Kayapa ? Urang kada mungkin parcaya pang wan aku, mun kadada bukti, Ti,
ai...”, sahut Khadijah pina maras.
“Bujur jua, lah... Makan gen dulu, kaina kita baatur bahasa”. Ujar Siti
pulang sambil manjulung nasi bungkus.
***
Di lain carita.
“Uu, Abahnya, kanapa Khadijah kada talihat dari aku datang tadi sampai
wahini?”, Takun uma Khadijah.
“Kada tahu, Umanya, ai... Tadi bulik satumat, imbah itu tulak pulang.
Kamana, kah? Imbah kutakuni pina kada manyahut. Maka tulak lawan lalakian
pulang”, Karamput Abah tirinya Khadijah.
“Babujur, ah... Asa kada biasanya Khadijah nang kaya itu. Tulak lawan lalakian
maka kada bapadah...!”, garunum Umanya sadikit kada parcaya.
“Sudahku tangati tatap aja inya tulak lawan lalakian nang itu. Bujur ja aku
lain abah bujurnya tapi paling kada aku sudah maanggap Dijah nang kaya anak
sorangan dah, uma Dijah, ai...”.
“Kaina inya amun bulik. Kupukuli tu pang!”, Ujar mama Khadijah pina
kasasangkalan.
***
2hari balalu.
Khadijah balum bulik-bulik ka rumah. Saking panasnya wan kasasangkalannya
umanya Khadijah ni.
“Kurang ajar banar Khadijah, ni ! Katalaluan banar ! 2 hari sudah kada
bulik ka rumah ! Kaina aku cari Ka sabalah kampung kita ni, umanya, ai”, tulak
sambil bakacak pinggang.
Padahal sidin
bamain judi di kampung subalah. Kisahnya banar, am mancari’i Khadijah.
Ckckck...
“Inggih bah, ai dicari si dijah tu dikampung sabalah, kakanak ngitu kiada
tahu dibasa banar.” Ujar umanya Khadijah.
Salang babarapa
manit datang si Siti ka rumahnya Khadijah.
“Assalamu’alaikum...”.
“Waalaikumsalam...”.
“Kada bajualan ka Pasar kah,cil?”takun Siti papadaan.
“Kayapa handak bajualan, hati kada tanang. Anak saikungannya bibinian 2
hari kada sing bulikan, nak, ai”, ujar sidin pina sadih.
Baparak, ai lalu
si Siti ni lawan umanya Khadijah. Lalu di kisah akannya kajadian nang
sabujurnya.
“Amun pian kada parcaya lawan ulun,
umpat ulun pian amun handak batamu Khadijah langsung. Amun kada kita cari aja,
cil, ai abah tirinya Khadijah gasan mambukti akan ulun badusta wan kadanya”,
ujar Siti mamadahakan.
Marasa yakin
handak mambuktiakan bujur wan kadanya panderan Siti. Tulak, ai badadua ka
Kampung sabalah mancari abah tirinya Khadijah. Takun manakun ka urang-urang, akhirnya
malihati jua uma Khadijah lawan lakinya. Umaaa.... sangkal wan kasasariknya
imbah maitihi kalakuan lakinya tadi bamain judi wan dikawani saikung bibian
nang baasuh dipaha lakinya. Balangsungan sidin manyuruh Siti manilpun akan Pulisi.
Salang babarapa
manit, mutur pulisi datang manggarebek tampat kajadian tadi.
“Imah... ?”, Ujar abah tirinya
Khadijah tadi takajut malihat ada bininya.
Plaaakkkk !! kapik
mama Khadijah sambil manarik-narik rambut lakinya.
“Lalaki kurang ajar ! purun banar
manyakiti aku lawan anakku ! Carai akan aku wahini jua !!”.
“Aku kada bamaksud manyakiti ikam,
Mah, ai... Aku...”.
“Pa, pulisi bawa langsung manusia
jahanam ninih ! Kalu parlu jangan dilapas akan, bunuh kah sakalian !”, ujar
mama Khadijah saking muarnya.
Imbah tuntung
masalah lakinya, kada lawas mancungul si Khadijah lawan pamannya si Siti ba
mubil. Kada banyak pander Khadijah langsung maragap mamanya.
“Maafi Mama, nak, lah nang
sabalumnya kada sing parcaya wan ikam”, ujar umanya manyasal.
“Inggih, kada papa, Ma, ai... ulun
gin minta maaf lawan pian 2harian kada sing bulikan ka rumah...”, tangis
Khadijah taharu wan umanya.
“Sudah-sudah. Mama kada mamparsalah
akan nintu lagi. Nang tapanting ikam salamat wan kada kanapa-kanapa.
Tarimakasih jua wan kawan ikam si Siti wan kaluarganya nang mau mambantu
manjaga akan ikam...”, Baucap sambil mamaluk Siti jua.
“Mama kada handak kawin lagi, jua,
nak, ai. Hidup lawan Dijah ja badadua mama bahagia banar, asal hidup kita
tanang, Dijah bisa jua kaya urang... Sakulah bujur-bujur, wan jangan
mangecewakan mama, nak, lah...”.
“Inggih...”, jawab Khadijah sambil
manyapu banyu matanya. Urang nang malihat gin taharu banar malihat uma wan
anaknya pina rukun. Imbah itu bulikan ai lagi Siti, Khadijah, lawan Umanya
diantari paman nya si Siti.
*SEKIAN*
